حلت الفنانة سهر الصايغ ضيفة على برنامج معكم والذي تقدمه الإعلامية منى الشاذلي على شاشة قنوات أون، وتحدثت خلاله عن دورها في مسلسل حكيم باشا وعلقت على الانتقادات التي طالتها بسبب اللهجة الصعيدية.

سهر الصايغ تكشف كواليس جديدة في دور برنسة 

وقالت سهر الصايغ في تصريحات رصدها موقع تحيا مصر: أنا حبيت برنسة مش كشخص وأفعال لكن لأني كنت ممكن شايفها إنها تعمل لى نقلة نوعية في الأدوار اللي ممكن أعملها، الدور كان مكتوب حلو جدا وده كان شيء مشجع بالنسبة لي وشوفتها من عدة جوانب، وبرنسة على كل هذا الشر ورغم الجبروت هي شخصية ضعيفة جدا وداخلها نقاط ضعف كتير، وداخلها حتت مكسورة كتير وده كان مفتاح برنسة، ومفيش حد عنده شر مطلق بلا سبب.

وأشارت سخر الصايغ أيضا، بحب مشاهدي مع مصطفى شعبان وبحبه جدا واشتغلنا مع بعض 3 أعمال وكانوا من أفضل الأعمال اللي بحبهم، وهو مريح جدا في اللوكيشن وزكي جدا.

سهر الصايغ: استغربت صدى برنسة رغم أنها شريرة مع اني طول الوقت بطلع طيبة وغلبانة

واستكملت سهر الصايغ حديثها عن شخصية برنسة: شخصية برنسه عندها جينات واخدها من الأب خبث وشر ومكيدة وعندها حاجات بحكم نشأتها وده مخليها عندها غيرة من باقي البنات اللي في القصر، وبتحاول السيطرة عليهم عشان تضايقهم ومضايقة من الاستقرار وأنهم متجوزين اللي بيحبوهم.

وتابعت: استغربت لأني طول الوقت بطلع طيبة وغلبانة لكن الصدى المرة دى كبير، والناس تفاعلها مع الشر لأنهم قبلوا شخصيات زي برنسة سواء في الشغل أو البيت.

سهر الصايغ ترد على انتقادات الجمهور للهجة الصعيدي 

وردت سهر الصايغ على انتقادات الجمهور للهجة الصعيدي، قائلة: الجمهور يقول اللي هو عايزه على رأسي من حقه ينتقد، واحنا في الأخر بنعمل عمل، وعارفين كصناع بنعمل أعمال تعرض للناس، واحنا بنبقى منتظرين تقييمهم، وبشكر على اللهجة الصعيدي محمود عفت، هو كان مصحح معانا، وقعدنا فترة طويلة نتدرب على اللهجة الصعيدي.

وأكدت سهر الصايغ في حديثها عن نجاح مسلسل حكيم باشا: في فريق عمل كبير خلف نجاح الشخصيات في مسلسل حكيم باشا، ولم يبخلوا عن العمل وطلع بشكل مشرف جدا"، مؤكدة أن عمرو الدرديري المشرف العام على المسلسل هو كلمة السر في العمل.